Magjistrat.alAkses Drejtësi · regjistri i hapur i sistemit të drejtësisë
Kreu › Njoftime publike
Njoftim publik

Njoftim për shtyp i Këshillit të Lartë Gjyqësor datë 14 Tetor 2020

Dokumente

Përmbledhje

Sot me datë 14.10.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi disa çështje të rëndësishme. Më konkretisht:

Me qëllim dhënien zgjidhje të problematikave në disa gjykata si dhe shërbimit në kohë qytetarëve, Këshilli vendosi caktimin në skemën e delegimit të magjistratëve z. Erjon Çela dhe z. Dritan Hasani dhe caktimin e tyre përkatësisht në Gjykatën e Apelit Shkodër dhe Korçë, për një afat të caktuar.

Në përputhje me qëllimet dhe objektivat strategjikë për funksionalizimin sa më shpejtë të Gjykatës së Lartë, evadimin e çështjeve gjyqësore të akumuluara, krijimin e një trupe mbështetëse profesioniste, Këshilli vendosi komandimin e znj. Engjëllushe Tahiri, znj. Lorena Çabej, znj. Iva Zemani dhe znj. Enisa Shahini, si ndihmës magjistrate në Gjykatën e Lartë.

Për shkak të mos aplikimit nga magjistratët në procedurat e mëhershme, Këshilli vendosi rihapjen e procedurës së ngritjes në detyrë për gjashtë vende vakante në Gjykatën e Posaçme të Shkallës së Parë dhe atë të Apelit për Korrupsionin dhe Krimin e Organizuar.

Në vijim të verifkimit të thelluar të kandidatëve për magjistrat për në formimin fillestar në Shkollën e Magjistraturës për vitin akademik 2020-2021, Këshilli vendosi kualifikimin e kandidatëve znj.Edlira Çota, znj.Ina Yzellari dhe znj.Enkeleda Halilaj.

Në përputhje me rendin e ditës, Këshilli vendosi kualifikimin e kandidatëve znj. Iliriana Olldashi dhe znj. Saida Dollani dhe vijimin e procedurës së emërimit në Gjykatën e Lartë, për pozicionet e lira për të cilat kanë aplikuar.