Njoftime Publike

Njoftim për shtyp i Këshillit të Lartë Gjyqësor datë 4 Dhjetor 2020

Sot, në datën 04.12.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në vijim të shqyrtimit të kandidaturave për ngritjen në detyrë në Gjykatën e Lartë, nga radhët e gjyqtarëve, Këshilli vendosi kualifikimin e kandidatëve dhe vijim e procedurave të emërimit për z. Gentjan Medja, z. Asim Vokshi, si dhe znj. Manjola Xhaxho, përkatësisht për pozicionet e lira në fushën e së drejtës administrative dhe civile. Gjithashtu, në vijim të verifikimit të thelluar të kushteve dhe kritereve ligjore të kandidimit, Këshilli vendosi kualifikimin për në formimin fillestar në Shkollën e Magjistraturës, për magjistrat, profili gjyqtar, për vitin akademik 2020-2021, për kandidatët znj. Elena Tafa, znj. Juliana Pjetri, znj. Klodjana Kryeziu, znj. Olta Cenaj dhe z. Noel Veizi.

Më shumë

Njoftim për shtyp i Këshillit të Lartë Gjyqësor datë 26 Nëntor 2020

Sot, në datën 26.11.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në zbatim të detyrimit Kushtetues dhe ligjor për ofrimin e informacionit të duhur për qasjen në drejtësi, me synim përcaktimin e parimeve, rregullave dhe procedurave për marrëdhëniet e Këshillit dhe sistemit gjyqësor me publikun, median e shkruar dhe elektronike, në funksion të komunikimit të ligjshëm, transparent, të përgjegjshëm dhe profesional, lehtësimin e vështirësive për aksesimin e lajmit për komunitetin e mediave dhe gazetarëve, rikthimin e besimit të publikut në drejtësi, Këshilli vendosi miratimin e Planit Strategjik të Komunikimit për Sistemin Gjyqësor, si dhe Rregullores për Komunikimin e Këshillit të Lartë Gjyqësor me Median. Në funksion të plotësimit të skemës së vlerësimit, Këshilli vendosi miratimin e modelit të hartimit të projektraportit të vlerësimit etik dhe profesional të gjyqtarit. Në kuadër të miradministrimit të fondeve buxhetore, Këshilli vendosi miratimin e fondeve të lira, nga buxheti i vitit 2020, në sistemin gjyqësor. Në vijim të shqyrtimit të kandidaturave për ngritjen në detyrë në Gjykatën e Lartë, për shkak të tërheqjes nga kandidimi, Këshilli vendosi përfundimin e procedurave të ngritjes në detyrë, për kandidatët znj. Elona Toro dhe znj. Etleva Temo. Në vijim të shqyrtimit në seancë dëgjimore publike të kërkesës së Inspektorit të Lartë të Drejtësisë për fillimin e procedimit disiplinor në ngarkim të magjistratit {…}, me detyrë gjyqtar në Gjykatën e Rrethit Gjyqësor {…}, pas administrimit të provave, ballafaqimit të palëve, dëgjimit të konkluzioneve nga ana e Inspektorit të Lartë të Drejtësisë, Këshilli vendosi caktimin e datës 10 Dhjetor 2020 për paraqitjen e konkluzioneve nga ana e magjistratit {…}.

Më shumë Më shumë

Njoftim për shtyp i Këshillit të Lartë Gjyqësor datë 20 Nëntor 2020

Sot, në datën 20.11.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në funksion të plotësimit të organikës së gjykatave të posaçme, për shkak të mungesës së kandidaturave në disa shpallje të mëparshme, Këshilli vendosi rihapjen e procedurës së ngritjes në detyrë për katër pozicione të lira në Gjykatën e Posaçme të Shkallës së Parë për Korrupsionin dhe Krimin e Organizuar dhe për tre pozicione të lira në Gjykatën e Posaçme të Apelit për Korrupsionin dhe Krimin e Organizuar, si dhe përfundimin e procedurës së ngritjes në detyrë në Gjykatën e Posaçme të Apelit për Korrupsionin dhe Krimin e Organizuar, për pozicionin e lirë të shpallur me vendimin nr.91, datë 26.02.2020. Në vijim të shqyrtimit të kandidaturave për ngritjen në detyrë në gjykatat e apelit, Këshilli vendosi verifikimin e plotësimit të tre kritereve ligjore të kandidimit nga kandidatët znj.Migena Laska, për pozicionin e shpallur në Gjykatën e Apelit Tiranë, z.Engert Pëllumbi, për pozicionet e shpallura në Gjykatën e Apelit Tiranë dhe Gjykatën Administrative të Apelit, si dhe znj.Arbena Ahmeti dhe z.Sokol Ibi për pozicionin e shpallur në Gjykatën Administrative të Apelit dhe vijimin e verifikimit për kriteret e tjera ligjore të kandidimit për secilin kandidat. Gjithashtu, në vijim të shqyrtimit të kandidaturave për ngritjen në detyrë në Gjykatën e Lartë nga radhët e gjyqtarëve, Këshilli vendosi verifikimin e plotësimit të tre kritereve ligjore të kandidimit për kandidatët z.Gentian Medja dhe z.Asim Vokshi, për pozicionet e shpallura në fushën e së drejtës administrative dhe vijimin e procedurës së verifikimit për kriteret e tjera ligjore të kandidimit. Pas krijimit të njësive të shërbimit ligjor në gjykatat e apelit, me qëllim dhënien e ndihmës gjyqtarëve për lehtësimin e punës së tyre dhe përshpejtimin e shqyrtimit të çështjeve gjyqësore, Këshilli vendosi emërimin e përkohshëm të nëntë ndihmësve ligjorë në disa gjykata të apelit, konkretisht, në gjykatat e Apelit Tiranë, Durrës, Shkodër dhe Korçë, si dhe shpalljen e shtatëmbëdhjetë vendeve vakante në pozicionin e ndihmësit ligjor në gjykatat e apelit.

Më shumë

Njoftim për shtyp i Këshillit të Lartë Gjyqësor datë 13 Nëntor 2020

Sot në datën 13.11.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në përfundim të procedurave të verifikimit të thelluar të kushteve dhe kritereve ligjore,pasurisë dhe figurës, të kandidatit të katërt për gjyqtar në Gjykatën e Lartë, nga radhët e juristëve të spikatur, z.Darjel Sina, Këshilli vendosi kualifikimin e tij si dhe vijimin e procedurave të emërimit në Gjykatën e Lartë. Gjithashtu, pas kryerjes së verifikimit të plotë të kushteve dhe kritereve ligjore të kandidimit, Këshilli vendosi kualifikimin e kandidatit z.Eriol Roshi dhe vijimin e procedurave të emërimit në Gjykatën Administrative të Apelit.

Më shumë

Njoftim për shtyp i Këshillit të Lartë Gjyqësor datë 12 Nëntor 2020

Sot në datën 12.11.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në vijim të shqyrtimit në seancë dëgjimore publike të kërkesës së Inspektorit të Lartë të Drejtësisë për fillimin e procedimit disiplinor në ngarkim të magjistratit {…}, me detyrë gjyqtar në Gjykatën e Rrethit Gjyqësor {…}, për shkak të mosparaqitjes për arsye shëndetësore të magjistratit, Këshilli vendosi të shtyjë seancën për datën 26 Nëntor 2020. Pas shqyrtimit të kërkesës për leje të papaguar për një afat të caktuar, për shkak të përkujdesit për fëmijët e mitur, Këshilli vendosi dhënien e lejes së papaguar për znj. Alda Sadiku, gjyqtare pranë Gjykatës së Rrethit Gjyqësor Kurbin dhe znj. Suela Lika, gjyqtare pranë Gjykatës së Rrethit Gjyqësor Mat. Në vijim, në përputhje me aktet ligjore dhe nënligjore përkatëse, si dhe me qëllim dhënien e ndihmës dhe lehtësimin e punës në gjykatat e apelit të vendit, Këshilli vendosi detajimin e pozicioneve aktuale të ndihmësve ligjorë nga gjykatat administrative të shkallës së parë pranë gjykatave të apelit të vendit si dhe emërimin e përkohshëm në pozicionin e këshilltarit ligjor në Gjykatën e Lartë të kandidatëve që kanë përfunduar programin e formimit fillestar 2019-2020 në Shkollën e Magjistraturës dhe konkretisht z. Metush Meçka, znj. Edlira Llango, z. Gerti Shani dhe znj. Evriklejda Semani. Në përputhje me rendin e ditës, Këshilli vendosi përfundimin e procedurës së verifikimit për shkak të dorëheqjes, për z. Ilir Korbi, kandidat për ndihmës ligjor për fillimin e programit të formimit fillestar pranë Shkollës së Magjistraturës. Në kuadër të mirëadministrimit dhe menaxhimit të fondeve të buxhetit gjyqësor, Këshilli vendosi rishpërndarjen e fondeve buxhetore në shpenzime operative, për disa gjykata të vendit. Në përfundim, në përputhje me detyrimet ligjore, Këshilli miratoi listën e gjyqtarëve kandidatë për anëtarë të Këshillit të Emërimeve në Drejtësi, listë e cila do i përcillet menjëherë Presidentit të Republikës, në funksion të zhvillimit të procedurave të shortit për përzgjedhjen e anëtarëve të Këshillit të Emërimeve në Drejtësi.

Më shumë

Njoftim për shtyp i Këshillit të Lartë Gjyqësor datë 05 Nëntor 2020

Sot në datën 05.11.2020, Këshilli i Lartë Gjyqësor zhvilloi mbledhjen plenare të radhës, në të cilën shqyrtoi çështjet si vijon: Në vijim të shqyrtimit në seancë dëgjimore publike të kërkesës së Inspektorit të Lartë të Drejtësisë për fillimin e procedimit disiplinor në ngarkim të magjistratit {…} me detyrë gjyqtar në Gjykatën e Rrethit Gjyqësor {…}, Këshilli vendosi të shtyjë seancën dëgjimore për datën 12 Nëntor 2020, për shkak të mosparaqitjes në seancë për arsye shëndetësore të magjistratit. Në vijim të shqyrtimit të kandidaturave për ngritjen në detyrë në disa gjykata, Këshilli vendosi përfundimin e procedurave për shkak të tërheqjes për një ose disa pozicione të lira për kandidatët z. Engert Pëllumbi, z. Erjon Bani, znj.Irida Kacerja dhe znj. Migena Laska si dhe fillimin e procedurës së verifikimit të kritereve ligjore të kandidimit për ngritjen në detyrë në gjykatat e apelit të juridiksionit të përgjithshëm, për pozicionet e lira të shpallura me datë 07.10.2020. Gjithashtu në këtë kuadër, Këshilli vendosi hapjen e procedurës së ngritjes në detyrë për një pozicion të lirë në Gjykatën e Apelit Korçë, dy pozicione të lira në Gjykatën e Apelit Shkodër dhe një pozicion të lirë në Gjykatën e Apelit Vlorë. Në vijim, me qëllim lehtësimin e punës për evadimin e shpejtë të çështjeve gjyqësore, Këshilli vendosi krijimin e bazës së të dhënave në Gjykatën e Lartë si dhe dhënien e aksesit në sistemet e menaxhimit të çështjeve gjyqësore të gjykatave. Në përfundim, Këshilli vendosi komandimin në skemën e delegimit të gjyqtarit z. Sokol Pina si dhe caktimin e tij për të gjykuar në Gjykatën e Apelit Gjirokastër.

Më shumë